Miarritzeko Ikus-entzunezko Saioen Nazioarteko Jaialdiak urrezko sariak banatuz hetsi ditu ateak. Asteartetik 130 ikus-entzunezko ikusi ahal izan dira Lapurdi kostaldeko hiriko aretoetan, eta epaimahaiak eman du jada lehiaketaren ebazpena. Gizon xalo baina zoriontsu baten bizitzari buruzko Julian Farinoren Marvellous (Zoragarria) filmak eta protagonistaren rola izan duen Toby Jones aktoreak jaso dituzte fikzio arloko eta gizonezko aktore onenaren Urrezko FIPA sariak.
Euskal Herriko gertakari eta pertsona historikoak oinarritzat hartu dituen Sanctuaire (Santutegia) filmari ere eman dizkiote zenbait sari. Dolores Gonzalez Katarain Yoyes interpretatu duen Juana Acosta aktoreak irabazi du fizkio arloko aktore emakumezko onenarena, eta gidoi onena ere film horrena izan da. Xabi Molia baionesa dago gidoigileen artean.
Sailen kategorian, Happy Valley (Haran Zoriontsua) izan da saritutakoa. Ingalaterrako bailara batean gertatutako bahiketa bati buruzko segida da.
Dokumental eta erreportajeak
Fikzioaz gain, bertzelako kategoriek ere izan dute saririk. Dokumentalen artean 2007an Finlandiako eskola batean zortzi ikaskide hil zituen Pekka gaztearen istorioa aipagai duen ikus-entzunezkoa saritu dute, Alexander Oeyren Pekka. Egoera horretara nola iritsi zen azaltzen saiatzen da dokumental egilea. Erreportajeen alorrean, bertzalde, Hamir Sardarren Taïga izeneko ikus-entzunezkoak irabazi du. Mongoliako ehiztari batek otsoak hazteko egiten duen saiakera azaleratzen du filmak.
