Melissa Aldanak osatuko du biharko kartela Gasteizko Jazzaldian. The Bad Plus taldea zen aritzekoa, baina, Europan zehar egitekoak ziren bira bertan behera utzi dute familiako osasun arazo batengatik, gaur jakinarazi dutenez. Saxofoi jotzailea da Aldana, txiletarra eta jazzaren egungo eszenako izarretako bat. Berezia da musikarekiko duen begirada eta haren interpretazioetan nabarmentzen du hori, berebiziko apustua egiten baitu berrikuntzarako.
Etxetik datorkio saxofoiarekiko grina, haren aita Marcos Aldana ere instrumentuaren profesionala baita. Gasteizen aurkeztuko dituen abestiekin osatuko du seigarren diskoa, orain sortze eta grabatze lanetan ari dena. 12 stars (2022) disko arrakastatsuko kantuak ere interpretatuko ditu.
2017an izan zen azkenekoz Gasteize Aldana, aldi hartan, Woman to Woman proiektuaren kari aritu zen. Emakumeek osatutako zazpikoa izan zen orduan oholtzan: Renee Rosnes pianoan, Cecile McLorin Salvant abeslari, Anat Cohen klarinetearekin, Ingrid Jensen tronpetan, Noriko Ueda kontrabaxuan, Alison Miller baterian eta Aldana bera saxofoian.
Programazio aldaketa hau dela eta, Gasteizko Jazzaldiaren antolatzaileek sarrera itzultzeko edota beste egun batekoarekin aldatzeko aukera eman dute. Gasteizko turismo bulegoan daukaten bulegoan egin ahalko da, baita [email protected] helbidera idatzita ere.