Michael Jackson hil da

Michael Jackson (Ameriketako Estatu Batuak, 50 urte) popeko artistarik nagusietakoa hil da gaur, bihotzekoa izan ondotik. Bart izan du ezbeharra, Los Angelesen (AEB) etxean zela, erietxera egoera kritikoan eraman dute eta segituan zendu da.

Osasun ahula zeukan Jacksonek. Esaterako, haren bozeramaile Brian Oxmanek adierazi du medikamendu asko ari zela hartzen azkenaldian kantaria. "Hanka bat hautsi berri zuen, orno bat ere bai, eta osatzeko ari zen jarraitzen tratamendua", esan du Oxmanek. Los Angelesko Poliziak heriotzari buruzko ikerketa abiatu du, "badaezpada".

Hainbat urtean jendaurrean musikatik aparte egon ostean, uztailaren 17an Londresen itzultzekoa zen Jackson. 50 emanaldi egin nahi zituen han, eta sarrera denak agortuta zeuden dagoeneko.

Azkeneko hamarkadetan sona handiko abeslaria izan da; batik bat, 1982an Thriller diskoa atera zuenetik. Inoizko diskorik salduena izan da: ehun milioi ale. Kanta haren bideoklipak gailurrean jarri zuen.

Lau urte zituenetik oholtzan

Lau urte zituela egin zuen debuta oholtzetan, eta hamabirekin munduan ezaguna zen dagoeneko, Jackson Five taldean zela. Hogei urterekin lortu zuen bere lehen Grammy saria -Don't stop 'til you get enough, 1979), eta denera hamahiru irabazi zituen.

Gizartean polemika handia sortutako gizona izan da. Batetik, gaztetxo bati sexu gehiegikeria egotzita hamarkada honen hasieran arazoak izan zituen, baina epaile batek kargurik gabe libre utzi zuen 2005ean. Bestetik, azal beltzekoa zen arren, zuri bihurtzeko makina bat ebakuntza egin zituen.

Jackson bi aldiz ezkondu zen: lehendabizi Lisa Marie Presleyrekin -Elvis Presley zenaren alaba- eta gero Deborah Rowerekin. Azken horrekin bi haur izan zituen -Prince Michael eta Paris-, eta beste emakumezko batekin ere izan zuen seme bat -Prince Blanket Michael Jackson II-.