MUSIKA. Argitaratu berriak

WILD NOTHING

'GEMINI'

CAPTURED TRACKS

Dream-pop malenkoniatsuko harribitxi batekin (Live in Dreams) hasten da Gemini, Wild Nothingen estreinako lana, eta Radio Dept-en eskolako indie-pop hit batekin jarraitzen du (Summer Holiday). Sorpresa gutxi, 80ko hamarkadako revival-a sasoi betean dagoen garaian. Eta nolanahi ere, freskoa, hunkigarria eta oso iradokitzailea da. Elektronika ukitu xumeez janzten dituenean ametsetako melodiak (Pessimist, Bored Games), bat-batekotasuna lehenesten duenean (O Lilac), Johnny Marr omentzen duenean (Our Composition Book) eta Cocteau Twins eta The Cureren eremu onirikoetara hurbiltzen denean. M. L.

BANDA ACHILIFUNK &ORIGINAL JAZZ ORQUESTA

'GITANO REAL'

LOVEMONK

Lan honek Achilifunk proiektuaren trilogia itxi du. Orkestra berezia osatu dute, rumba, mestizaia eta funk musikariak (Sabor de Gracia, La Troba Kung-Fu, Papawa, Fundacion Tony Manero, Chocadelia...) jazz banda zabal batekin (Taller de Musics) elkartuz. Disco soinua, soul, funk, rap eta beste hainbat erritmo elkartzen dira ideiaren zerbitzuan. Imajina ezazu jazz big band iaioa, rumba eta funk-aren artean; emaitza, jai hutsa. Agurmoduan Michael Jackson-en Bad, instrumentu hutsezko bertsioan. Mende honetako rumba garaikidea, dantzan egiteko primerakoa eta bikain garatua. JOSEBA MARTIN

CUCHILLO

'DUAT'

LIMBO STARR

Psikodelia garratza egiten duen bikotea da Cuchillo. Perkusioa eta gitarren doinuek osatutako kantuak dira, ilun eta lisergikoak. Bidaia azidoak egiteko aproposak. Urteko disko onenen zerrendetan falta ez zen lehen diskoa atera eta gero, EP bitxia dakarte orain. Hiru kantuk osatzen dute, eta ordubete baino gehiago irauten du, horietako bat hamalau minututik gorakoa. Bartzelona eta Los Angeles artean grabatu duten diskoan doinu hipnotikoak eta etengabe errepikatzen diren melodiak datoz. Abesti esperimental bezain dotoreak dira, eta Egiptoko mitologiak eragina duten letrez beteta daude. ARKAITZ VILLAR