Liceu, Teatro de la Maestranza eta Salas del Arenal antzokiek ekoitzitako Giacomo Pucciniren Tosca operaren emanaldiaz gain —Kursaaleko auditoriumerako egokitua eta Euskadiko Orkestra Sinfonikoaren eta Ainhoa Arteta sopranoaren parte hartzearekin—, Mahler Chamber Orkestra, San Petersburgoko Orkestra Filarmonikoa eta Koloniako Irratiko Orkestraren emanaldiak nabarmendu ditu, beste batzuen artean Patrick Alfaya Musika Hamabostaldiko zuzendariak gaur eguerdian, Donostiako jaialdiaren aurtengo egitarauaren aurkezpena egitean.
Orotara bederatzi ziklotan banatutako 74 musika emanaldi eta bestelako bi ekimen izango dira abuztuaren 1etik 30era bitartean, Donostian ez ezik Gipuzkoan, Bizkaian, Araban, Nafarroan eta Lapurdin.
Oroitzapen ospakizunen artean, Jose Maria Usandizaga donostiar musikagilea (1887-1915) protagonista dutenak izango dira garrantzitsuenak, duela ehun urte hil zela gogoratuz. Orotara 15 emanalditan eskainiko dira haren obrak, eta horien artean izango da Mendi mendiyan operaren emanaldia, Euskadiko Orkestra Sinfonikoaren eta Easo abesbatzaren parte hartzearekin.
Abonuen kopuruari %100ean eutsi dio Hamabostaldiak aurtengo ekitaldiari begira, eta sarrera arrunten salmenta ekainaren 5ean hasiko da, 11:30ean, Interneten (www.quincenamusical.eus), Kursaalean zein Viktoria Eugenia antzokian.
