Ia 11 urte igaro ditu idazle iruindarrak (1960) hiru liburuak osatzen —Mailuaren odola (2006) eta Izan bainintzen Nafarroako errege (2009)—, eta 8.000 metrotik gorako mendi bat igotzearekin konparatu du, gaur goizean, Donostian egindako aurkezpen ekitaldian. "Izozterik gabe heldu naiz oinarrizko kanpalekura, baina prozesuan nire gorputzaren eta osasunaren zati bat joan da", aitortu du.
Nafarroako konkistari (1512) buruz irakurri zituen bertsio kontrajarriei erantzun bat aurkitzeko hasi zen libururu hirukotea osatzen, eta horretan Joanes Mailu fikziozko pertsonaia da protagonista. "Erregearen odola dauka, baina sasikoa da. Baztertu egiten duten arren, erresumari eta fedeari oso fidela da. Nafarroako Erresumaren azken gudaria, zerbitzaria, soldadua izan zen". Haren "bestaldea, ifrentzua", Pedro Agerre Axular apaiza da. "Biografiak-eta irakurrita, badakigu non sortu zen, zer egin zuen, baina ez nolakoa zen. Eta hori abantaila bat da literatura sortzaile batentzat. Hortaz, nik nire Axular sortu dut".
Trilogiaren hirugarren liburua 1586 eta 1610 artean kokatu du, eta nabarmendu nahi izan du abentura nobela bat dela eta asko duela, aldi berean, XVII. mendeko nobela pikareskotik. "Sinesgarritasunaren mesedetan ahalik eta zorrotzena izaten saiatu naiz, baina fikzioak pisu handiagoa dauka".
