Haurrek protagonismo berezia bereganatu dute Donostiako 48. Jazzaldian. Izan ere, aurten abian jarri duten Txikijazz ekimenari esker, jazzaren erritmoak oholtza gainean dantzatzeko aukera izan dute. Dantzatu, eta baita jo ere, igandera bitarte antolatu dituzten ekitaldien artean, gaur, Musikanaiz elkarteak kontzertu didaktikoa eskaini baitu.
Haurrek jazz munduan ohikoak diren musika instrumentuak gertutik ikusteko aukera izan dute, eta zorte handiena izan dutenek, bolondres asko egon baitira, musikariekin batera aritu dira oholtza gainean. Gainera, jazzaren historiaren bitartez, musika estilo ezberdinak ezagutzeko parada ere izan dute.
Gaztetxoenak espazio komun batean elkarrekin egon daitezen, eta teknologia berriez, musikaz eta arteaz goza dezaten sortu da Txikijazz ekimena. Igandera bitarte, antolatutako jarduerekin gozatu ahal izango dute gaztetxoenek eguerdiro Kursaaleko zabaltzan. Doakoak dira, eta hamalau urtera arteko haurrei dago zuzendua. Jarduera guztiak euskaraz izango dira.
