Oihane Pereak 352,5 puntu batu ditu, Aramaioko kultur etxean gaur arratsaldez jokatutako saioan. Bigarren sailkatu da Iker Agirre (328,5 pt.), hirugarren Ruben Sanchez (322,5 pt.), laugarren Jon Ruiz de Pinedo (283,5 pt.), bosgarren Irati Anda (277,5 pt.) eta azkena Unai Bengoetxea (262 pt.). Oker handirik ezean, Pereak finalean kantatuko du, datorren martxoaren 21ean, Gasteizen. Izan ere, finalaurrekoan lehen faseko lehen saioan ere bera izan baitzen onena. Finalean sei bertsolari lehiatuko dira.
Finalaurrekoan bigarren faseko bigarren saioa datorren larunbatean jokatuko da Zigoitian, eta hirugarren eta azkena martxoaren 7an Langraitz-Okan.
Pereak hiru aldiz irabazi du Arabako Bertsolari Txapelketa: 2007an, 2009an eta 2013an.
