Olatu Talkarako herritarren proposamen «berritzaileak» eskatu dituzte

Herritarrek duten sortzeko gaitasuna erakutsi nahi du, bigarren urtez, Olatu Talka jaialdiak, maiatzaren 27tik 29ra bitartean. Donostia 2016ko Europako Kultur Hiriburu izateko hautagaitzaren aldeko jaialdiak arrakasta izan zuen iaz.

«Udaberriko jaialdi herrikoia» prestatzeko, herritarren ideiak bilduko dituzte datozen bi hilabeteetan, www.rompeolas.eu orrian eta 2016 Bulegoan. «Proposamenak gurutzatzeko ideien azoka bana antolatuko dugu otsailean eta martxoan», iragarri du Eva Salaberria 2016 Bulegoko koordinatzaileak. «Ideia originalak eta berritzaileak balioetsiko ditugu bereziki, lankidetza sustatzen dutenak eta ingurumenarekiko jasangarriak direnak».

Odon Elorza alkateak 2016ko hautagaitzarako herritarrak ematen ari diren babesa eskertu du.Eta antolatzaileek maiatzeko jaialdirako deialdi berezia egin diete gipuzkoar guztiei, «Olatu Talka lurralde osoaren jaialdia delako, ez soilik donostiarrena». «Kultura eta sorkuntza ekintzak burutzen dituzten herritaren sormen eta energia erakusteko aukera bat da», Salaberriaren esanetan. «Gainera, gizartearen sorkuntza ahalmena bideratzeaz gain, erakunde sozial eta kulturalen lankidetza bultzatzen du».