Oscarretarako 11 izendapen jaso ditu 'The Lord of the rings'-ek

Urrezko Globoetan garaile izan ondoren, The Lord of the rings: The return of the king, Peter Jacksonen trilogia fantastikoaren azken atala, Oscar sarietarako faborito nagusia da atzotik. Filmak Hollywoodeko akademiaren sarietarako 11 izendapen jaso ditu, tartean film, zuzendari eta egokitutako gidoi onenari dagozkienak.

Haren atzetik, Master and commander: The far side of the world Peter Weirek zuzendu eta Russell Crowe protagonista duen filmak hamar izendapen bildu ditu. Weir zuzendari onenarentzako saria jasotzeko hautagaia da eta, halaber, bost film onenen artean dago itsas abentura hori. Lost in translation Sofia Coppolaren bigarren filma, Clint Eastwooden Mystic River eta Gary Rossen Seabiscuit dira boskotea osatzen duten beste hiru filmak. Azken hori, zaldi lasterketen munduan girotutako drama, bihurtu da izendapenetako ezustekorik handiena; harrera ona izan duen arren, inork gutxik kokatzen baitzuen hautagai nagusien artean. Guztira, bost sari jaso ditzake.Hain zuzen, Seabiscuit-en zuzendari Gary Ross izan da atal horretatik kanpo gelditu den zinemagile bakarra. Jackson, Coppola, Weir eta Eastwoodekin batera, Fernando Meirelles brasildarra lehiatuko da zuzendari onenaren Oscar saria eskuratzeko Cidade de Deus filmean egindako lanagatik. Meirellesen filma ez zuten ingelesez besteko filmen atalean izendatu joan den urtean, baina, AEBetan 2003an estreinatu zenez, aurten lau sari jasotzeko hautagaia bihurtu da; zuzendariari, gidoiari, argazkiari eta muntaiari dagozkien ataletan izendatu baitute. Beste aldean, Cold mountain, AEBetako gerra zibilean girotutako drama, bihurtu da Oscarretarako lasterketan lehendabizi erori den filma. Zazpi izendapen dit, baina Anthony Minguellaren filma ez dute hautatu ez film onenari ez zuzendari onenari dagozkien ataletan, eta The english patient-en zuzendariak ez du errepikatuko film harekin lortutako arrakasta. Cold mountain-eko aktore Nicole Kidman ere izendatuen artean egongo zela zioten askok, baina Jude Lawk eta Renee Zellwegerrek film berean egindako lana hobetsi du Akademiak.

'Mystic River'-en hirukotea

Clint Eastwooden Mystic River filmak ez ditu The Lord of the rings: The return of the king-ek edo Master and commander: The far side of the world-ek adina izendapen jaso, baina, hala ere, hautagaia da atal nagusietan. Izan ere, saria jaso dezake film, zuzendari, gizonezko aktore nagusi (Sean Penn), bigarren mailako gizonezko aktore (Tim Robbins), bigarren mailako emakumezko aktore (Marcia Gay Harden) eta gidoi onenen ataletan.

Emakumezko aktore onenaren sailean, Keisha Castle-Hughes 13 urteko gaztea izendatu dute Whale rider filmagatik, eta haren ondoan Diane Keaton, Samantha Morton, Charlize Theron eta Naomi Watts lehiatuko dira. Gizonezko aktore onenaren sailean, bost aktore ezagun izendatu ditu Hollywoodeko akademiak: Sean Penn, Jude Law, Ben Kingsley, Bill Murray eta Johnny Depp. Murrayk eta Pennek Urrezko Globoa jaso berri dute, hurrenez hurren, Lost in translation-en eta Mystic River-en egindako lanagatik.Bigarren mailako aktoreei dagozkien ataletan, izen ezagun eta ezezagunak bildu dituzte izendapenek. Emakumeen artean, Renee Zellweger Urrezko Globoa irabazi berri duena da hautagai nagusia, baina Marcia Gay Harden eta Thirteen-eko Holly Hunter izango ditu lehiakide. Shohreh Aghdashloo iraniarra eta Patricia Clarkson ere izendatuak daude. Gizonezko aktoreen artean, Benicio del Toro-k, Traffic-en egindako lanarekin Oscar sari bat jaso eta hiru urtera, errepikatzeko aukera izango du aurten. 21 grams Alejandro Gonzalez Iñarrituren filmak jaso dituen bi izendapenetako bat da berea. Tim Robbins Urrezko Globoaren irabazlea izango du aurkari nagusia. Beste hiru hautagaiak Alec Baldwin, Djimon Hounsou eta Ken Watanabe izango dira.

Zuzendari ezezagunak

Ingelesez besteko film onenen sailean, berriz, zuzendari nahiko ezezagunen lanak izendatu dituzte. Izan ere, Denys Arcand zinemagile kanadar ezagunaren Les invasions barbares-ekin batera, Mikael Hafstron suediarraren Ondskan-ek, Yoji Yamada japoniarraren Tasogare seibei-k, Ben Sombogaart holandararren De tweeling-ek eta Ondrej Trojan txekiarraren Zelary-k jaso dituzte izendapenak.

Oscar sariak otsailaren 29an banatuko dituzte Kodak Los Angeles hiriko antzokian.