Gaur eman du jakitera Calvo Serrallerrek bere erabakia patronatuan. Onartu egin dute haren ukoa patronatukoek. Fundazioak eman du albistearen berri hedabideei helarazitako ohar baten bidez, eta eskertu egin dute haren lana. 2012an hartu zuen postua arte historialariak. Eta hala laburtu du fundazioak hark egindako ibilbidea: "Denbora horretan zehar oso kalitate handiko kultur programazio bat definitu du. Eta, horren barnean, nazioartean ospea irabazitako hainbat eskultore Nafarroara etorri izana nabarmentzen da, tartean izan baitira Richard Serra –honi Nafarroako Unibertsitate Publikoak honoris causa doktoretza eman zion-, Richard Deacon, Waltercio Caldas eta pintore ere baden Miquel Barceló".
Ez da polemikatik libre izan lehendakaria, halere. Uda aurrean bermea eskaini zion Valentziako IVAM museoan egindako erakusketa bati. Zenbait adituk zalantzan jarri zuten, ordea, Oteizaren lan horiek Oteizak egindakoak ote ziren, eta izan zen Orioko artistari eskainitako erakusketa horren kalitatea dudan jarri zuenik ere. Bere izenean eman zion babesa Calvo Serrallerrek erakusketari, baina artean, Oteiza fundazioko presidentea zen. Fundazioak bidalitako oharrean ez diote, ordea, aipamenik egin gertakari horri. Azaltzen dutenez, "arrazoi pertsonalak" aipatu ditu lehendakari izandakoak postua uzteko. Patronatuko kideek
Aurrerantzean, Fundazioaren Patronatuak lehendakari berria izendatu bitartean, Fundazioaren idazkari eta Nafarroako Gobernuaren Kulturako zuzendari nagusi den Ana Zabalegi izango da jarduneko lehendakaria. Patronatuak hautatuko du hurrengo lehendakaria eta gehiengo absolutuz hautatu beharko dute. Eta izendapena hurrengo saio batean egin beharko dute.
