Oteizaren lanarekin solasean sorturiko eskultura

Egungo artistak Jorge Oteizari begira jartzea da Oteiza Fundazioa eta Iruñerriko Mankomunitateak sorturiko Interpretazioak programaren helburua. Artistaren lana begi garaikidez berrikustea. Palentzian (Espainia) jaio, eta Iruñean hazitako David Rodriguez artista izan da lan hori hartu duen azkena. Oteizaren lanetik abiatuta sortu du Interpretazioak, elkarrizketa bat Jorge Oteizarekin izeneko lana, etaOteiza museoan egongo da maiatzaren 30era arte. Oteizaren lanekin batera. Solasean.

Metro eta erditik gorako aluminiozko pieza bat da Rodriguezen lana, eta, dioenez, Oteizaren bi konstante nagusi hartu ditu abiapuntutzat: hutsuneari buruzko gogoeta eta metalaren erabilera. «Pieza honen asmoa ez da Oteizari buruzko teorizazioak egitea», dio Rodriguezek, «elkarrizketaren bitartez hura aberastea baizik, haren eta nire sorkuntzaren arteko puntu komunak baliatu ditut horretarako».

Oteizaren poesia eta haren eskultura lanak izan dira, Rodriguezek dioenez, pieza berria sortzeko oinarriak, eta gero heldu da solasaldira. Lanaren garapena azaltzen duen argazki eta marrazkiz betetako liburuxka bat ere argitaratu du Oteiza fundazioak, sortze prozesua ezagutarazteko.