Pale Jay
'Bewilderment'
Diskoetxea: Karma Chief Records
Iragan abuztuan plazaratutako diskoa izanagatik ere, ez dirudi soul kutsuko lan hau asko zabaldu denik gurean; diskoan bildutako bi kantu berreskuratzen dituen eta oraintsu argitaratutako single baten bidez ezagutu baitut Pale Jay musikariaren Bewilderment bikain hau. Jatorriz jazz musikaria, Pale Jay maskaratuak falsettoz abestutako, soul eguzkitsuan epeldutako eta soka-konponketekin apaindutako zortzi doinu garaikide, bare eta hipnotiko jaso ditu grabazioan. Hondartzan etzanda entzuteko modukoak. Diskoetxeak «urruneko espazioko soul hautseztatu» izendapenarekin merkaturatu du diskoa.
