Goran Paskaljevic zuzendari serbiarra ezaguna da lehen ere Donostiako Giza Eskubideen Zinemaldian. 2010ean jaialdiaren saria jaso zuen, giza eskubideen inguruan urteetan egindako film guztiengatik. Haren When Day Breaks filmak zabalduko du jaialdia.
Aurtengo saria berezia Patricio Guzman txiletarrak jasoko du aldiz, itxiera egunean, apirilaren 26an. Egun horretan bertan emango dute, hain zuzen ere, Andres Wood txiletarraren Violeta se fue a los cielos (2011). Violeta Parra musikari txiletarrari buruzko dokumental berezia da jaialdiari amaiera emango diona.
Euskarazko film bakarra Jone Karresek eta Eneko Olasagastik zuzendutako Alardearen seme-alabak izango da, Irun eta Hondarribiko alardeen inguruko dokumentala. Beste bi ekoizpen Euskal Herrikoak dira: Juan Dopico Massobrioren Agronautas eta Jorge Gil Munarrizen El método Arrieta. Webgunean ikus liteke egitarau osoa.
