Pop musikaren instituzio bat

Sarrera guztiak daude salduta dagoeneko, eta horrek ematen du Teenage Fanclub talde eskoziarrak Euskal Herrian duen jarraitzaile kopuruaren neurria. Izar handiak izan gabe, Gerard Love, Norman Blake, Raymond McGinley eta Francis MacDonald instituzio bat dira gitarretan oinarritutako pop melodikoaren zaleen artean. 1990eko hamarkada hasierako pop zaratatsua (A Catholic Education) aspaldi utzi zuten atzean, eta, gaur egun, The Byrds eta Big Star gisakoen oinordeko handienetakoak bilakatu dira, besteak beste, Grand Prix (1995), Songs From Northern Britain (1997) eta Shadows (2010) lanei esker. Azken lan hori grabatu eta sei urtera, iaz, kaleratu zuten taldearen bederatzigarren disko ofiziala: Here. Lan horretan, Teenage Fanclubek heldutasun handia erakusten du, batetik, bat-batean itsasten diren kantuen bitartez (I'm in Love), eta, bestetik, kantu pausatuekin (Hold On).