«Zinema zuzendaria izatea jaso nezakeen oparirik ederrena izan zen». Ofizio izan zuena afizio ere izan zuen Richard Donner zinemagile estatubatuarrak (New York, 1930-2011), eta zaletasun hori bere lanean islatzen saiatu zen beti.
Bere belaunaldiko zinemagile asko bezala, telebistan eman zituen lehen pausoak, eta, 1960an hasita, hainbat telesail ikonikoetako atalak zuzendu zituen: The Twilight Zone, Perry Mason, Get Smart, The Fugitive, Ironside, Kojak...1976an, berriz, zinemarako jauzia egin zuen beldurrezko ekoizpen handi batekin: The Omen. The Exorcist filmak urte batzuk lehenago izandako oihartzuna baliatu nahi zuen filmak, eta Gregory Peck nahiz Lee Remick zituen protagonista. Filmak arrakasta izan zuen, baina askoz handiagoa izan zen handik bi urtera Superman-ekin lortutako oihartzuna. Ekoizpenak 55 milioi dolarreko aurrekontua izan zuen, 300 berreskuratu zituen mundu osoan, eta, gainera, bidea eman zien superheroiaren pertsonaian oinarritutako eta Christopher Reevek protagonizatutako hainbat filmi.
80ko hamarkadan arrakastari eutsi zion Donnerrek Ladyhawke abenturazko film erromantikoarekin eta The Goonies komediarekin, eta batez ere Lethal Weapon film sailarekin. Gerora zuzendu zituen Scrooged, Charles Dickensen Eguberrietako ipuina-ren moldaketa (1988) Maverick umorezko westerna (1994), Assasins (1995) eta 16 Blocks (2006), bere azkeneko lana.
