Rostropovitx txelo jotzaile eta orkestra zuzendaria hil da

Mstislav Rostropovitx (argazkian) txelo jotzaile eta orkestra zuzendari ezaguna hil da Moskun 80 urte zituela.

1927an jaio zen Rostropovitx, Bakun, Azerbaijango hiriburuan. Txelo jotzaileak zituen aita eta osabak, eta ume-umetan hasi zituen musika ikasketak. 8 urterekin hasi zen Moskuko Musika Kontserbatorioan, eta pianoa, txeloa, konposizioa eta zuzendaritza ikasi zituen. 1940an eman zuen lehendabiziko kontzertua, eta 1951n Sobiet Batasuneko saririk handiena jaso zuen: Lenin Saria. Beste bitan ere jaso zuen sari hori, 1953an eta 1964an. Mosku eta Leningradoko kontserbatorietan irakasle izan zen 1953tik 1974ra. Bitarte horretan Mendebaldeko herrietan ere ezagun egin zen hainbat emanaldi eskaini eta gero.

Sobiet Batasunean sari eta ohore handienen jabe egin zen arren, ez zegoen ados erregimenarekin, giza eskubideak urratzen zituela irizten ziolako, eta 1974an bere burua erbesteratzea erabaki zuen. AEBetako Bostongo, Los Angelesko, Chicagoko zein New Yorkeko orkestrak zuzendu zituien erabaki hori hartu ondoren, eta geroago, Londreskoa, Pariskoa eta Berlingoa. 1977tik 1994 bitartean AEBetako Orkestra Nazionalaren zuzendari nagusi izan zen. Bere buruari ezarritako erbestea hautsita, 1989an itzuli zen Errusiara.