Sail Ofiziala

'Die Lebenden / The death and the living'. Galerari eta norbere nortasuna aurkitzeari buruzko gogoeta eragin nahi izan du Barbara Albertek filmeko pertsonaia nagusiarekin –25 urteko neska gazte bat–, Berlin, Viena, Varsovia eta Errumaniara bidaiatuz eta hainbat gertaera historiko oroituz.

'The Attack'. Jatorri palestinarreko kirurgialari israeldar bat da Amin Jaafari, Ziad Doueiriren filmeko pertsonaia nagusia. Sekulako kolpea hartuko du jakiten duenean bere emaztea izan dela hemeretzi pertsonaren heriotza eragin duen atentatuaren egilea, emaztea bera ere hildakoen artean delarik.

'Venuto al mondo'. Gemmak Sarajevoko setio bortitzetik seme jaioberriarekin alde egitea lortu zuen, baina senarra galdu zuen han. Hamasei urte geroago, Sarajevora itzuli da semearekin. Sergio Castellittok zuzendutako film honek Penelope Cruz eta Jane Birkin ditu aktoreen artean.

ZUZENDARI BERRIAK

'The Love Songs of Tiedan'. Film honetan, Hao Jie zinemagile txinatarrak lirismoz eta umorez egiten du nekazari arrunten bizitza erromantikoaren erretratua; baita hura adierazteko erabilitako kultura tradizionalarena ere. Horretan badu Single Man (2010) bere lehen film luzearen antzik.

ZABALTEGI

'Bypass'. Patxo Telleria eta Aitor Mazo, zuzendari; Barbara Goenaga, Unax Ugalde, Sara Cozar eta Gorka Otxoa, aktore. Mariak, hilzorian, harekin maiteminduta dagoela esaten dio Xabiri; Xabik, errukiz gezurra esanez, berak ere maite duela. Maria osatu egingo da, ordea…

'Cesare deve morire'. Paolo eta Vittorio Tavianik Urrezko Hartza irabazi dute Berlinen film honekin. Erromako Rebibbia espetxeko presoek Wiliiam Shakespeareren Julio Zesar antzerki obran oinarrituta egiten duten emanaldia du ardatz.

ZINEMIRA

'Camera obscura'. Maru Solores zinemagile donostiarrak Aneren istorioa kontatu du. Anek 13 urte ditu, eta itsua da. Gurasoak ebakuntza egiteko aukera aztertzen ari diren bitartean, pubertaroan sartu da. Antonio osabaren bidez, argazkilaritza zer den ikasten du, eta, horrekin batera, gauza gehiago.