Santimamiñe eta Ekaingo pinturak baino orein, uro eta antropomorfo zaharragoak

Pedro Maria Gorrotxategik aurkitu zituen Arenatzako haitzuloko margolanak, 1973an. Oreinak daudeneko aretoa topatu zuen aurrena, eta uroena ondoren. Halaber, 2004an emakumezko antropomorfo bat aurkitu zuten uroen irudiak daudeneko paretatik metro bira. Lerro mehe batek osatzen du irudia, eta harria estaltzen duen estalagmitazko geruzaren gainean grabatua dago. Alboz dagoen gorputz bat erakusten du, bururik eta gorputz adarrik gabea. 34 zentimetroko garaiera du, eta 16 zentimetroko zabalera. Oreinak zein uroak puntuatze teknikarekin eginak daude. Madalein aldikotzat dituzte adituek, baina Santimamiñe, Ekain eta Altxerriko margolanak baino lehentxeagokoak direla diote. Kantabriako (Espainia) beste haitzulo batzuetan tankera horretako pinturak aurkitu dituzte, hala nola Covalanasen eta La Pasiegan.