William Shakespeareren Uda gau bateko ametsa antzerki lanaren emanaldi bana egingo dute egunero (astelehenetan izan ezik), ekainaren 21etik uztailaren 24ra, Donostiako Kristina Enea parkean. Donostia 2016k sustatuta, Tanttaka Teatroa konpainiak ondu du antzezlana, dramaturgoaren heriotzaren 400. urteurrenarekin bat eginez, eta askotariko diziplinak uztartuko ditu. Guztra, 30 emanaldi izango dira, eta 250 ikusle bilduko dira bakoitzean. Publikoa ez dela ikusle hutsa izango nabarmendu dute antolatzaileek, parte hartze aktiboa izango duela antzezlanean. Hain zuzen, Hermia eta Demetrioren —obrako pertsonaia nagusien— ezkontzako gonbidatuak izango dira ikusleak obraren barruan, eta eztei afariaz gozatzeko aukera ere izango dute antzezlanean.
Fernando Bernues eta Iñaki Rikarte ari dira zuzendari lanetan. Haien gidaritzapean, lan talde zabala ariko da gauero jardunean, 80tik gora lagun, emanaldia eskaintzeko. Horietatik hemezortzi izango dira aktoreak —besteak beste, Isidoro Fernandez, Ane Gabarain, Gorka Otxoa, Sara Cozar, Aitziber Garmendia, Itziar Atienza eta Joseba Apaolaza—, baina izango dira dantzariak ere, Jon Maiak prestatutako koreografiak eskaintzeko. Musikaz, berriz, Iñaki Salvador arduratu da, eta, aurreratu duenez, hari laukote bat eta haize boskote bat ariko dira emankizunetan, Easo abesbatzarekin batera. Patxo Telleriak moldatu du obra parkean eskaini ahal izateko.
Saio guztietarako sarrerak salgai daude dagoeneko. Publiko orokorrarentzat, aurrez erosita, 30 euro da prezioa (bestela, 40 euroan izango dira eskura), eta deskontuak izango dituzte hainbat kolektibok. Euria eginez gero, bertan behera utziko dira emanaldiak, eta sarreren dirua itzuliko zaie erosleei.
