Shellacek Hondarribian joko du ekainaren 5ean

Gaztemaniak egitasmoaren programazioa aurkeztu zuten, atzo, Donostian. Oraingoz, sei kontzertu lotu dituzte, eta horien artean Shellacek datorren ekainaren 5ean Hondarribiko Psilocybenea aretoan emango duena nabarmendu beharko da. Gipuzkoako Foru Aldundiak eta Gipuzkoako bost udalek (Donostia, Arrasate, Hondarribia, Oñati eta Zarautz) antolatutako egitasmoa gaur hasiko da. Inoren Ero nik eta Willis Drummondek Gazteszenan joko dute, 20:30ean hasita.

Inoren Ero Ni taldeko kideak, hain zuzen, Shellacen zaleak dira, eta haren A minute abestiaren bertsioa egiten zuten garai batean, zuzenekoetan. Chicagoko taldea da Shellac, 1992an sortutakoa, eta, haren kideen esanetan, «rock minimalista» egiten dute. Oso bizia, eta matematikoa, neurri batean. Estudioko bost disko kaleratu dituzte —azkena 2007an, Excellent Italian Greyhound izenekoa—. Steve Albini disko ekoizle entzutetsua da gitarra jotzailea eta burua, Todd Trainer bateria jotzailea eta Bob Weston baxu jotzailea. Euskal Herrian azkenekoz 2008ko maiatzean aritu ziren, Bilboko Kafe Antzokian.

Halere, Shellacena baino lehenago, beste lau kontzertu daude programatuta, gaurkoaz gain. Martxoaren 23an, Zarauzko Lizardi antzokian, Jonathan Richman bakarlari estatubatuarra ariko da. The Modern Lovers taldearen sortzailea izan zen, baina bakarka nabarmendu da, batez ere. Haren aurretik Unax Noga zarauztarrak joko du. Apirilaren 20an, Oñatiko gaztelekuan, Radio Moscow talde estatubatuarra arituko da. Iaz kaleratu zuen azken diskoa, hirugarrena, The Great Escape of Leslie Magnafuzz izenekoa, eta rock psikodelikoa lantzen du, batez ere. Maiatzaren 11n Cubicalek (Ingalaterra) joko du Arrasateko Amaia antzokian. Ekainaren 5ean, Shellacekin batera, Helen Money Chicagoko taldea arituko da, eta urrian —oraindik ere ez dute eguna zehaztu—, Psilocybenean, Howlin Rain (AEB) joko du. Kontzertuetarako txartelak www.kulturalive.com atarian eskura daitezke.