Sherko Bekas (1940-2013) Kurdistango poeta nagusietakoa zen, eta haren obra hizkuntza askotara itzulia zegoen; besteak beste, euskarara. Hegats aldizkariak, hain zuzen ere, Kurdistan: herria, kultura, literatura izeneko alea kaleratu zuen 2010ean, eta, bertan, Bekasen hiru lan argitaratu zituzten, Urtzi Urrutikoetxeak itzuliak: Haziak, Ekaitzaldia eta Bereizketa.
Bekasek bat egin zuen 1965ean Kurdistan askatzeko mugimenduarekin, eta haren irratian lan egin zuen. Gero, eta Irakeko erregimenaren presioen ondorioz, erbesteratu egin behar izan zuen 1986an. Suedian bizi izan zen 1987tik 1992ra.
