Sherlock Holmes, Europan barna

Antza denez, Guy Ritchiek ospea eman zioten thriller ilun eta korapilatsuak alde batera utzi eta nahiago du zinema komertzialaren gerizpean babestuta segitu. Orain dela bi urte Sherlock Holmes pelikula kaskartxoa egin zuen, baina diru sarreren aldetik oso ongi joan omen zitzaien ekoizleei. Eta, jakina, bigarrenaren gainean lanean hasi ziren segituan.

Lehenengoaren ia talde osoa mantendu dute bigarren honetan ere; Robert Downey Jr. ezagunak detektibe famatuarena egin du, eta Jude Lawek, Watson laguntzailearena. Horien ondoan, Rachel McAdams eta Kelly Reilly aktoreak ere aritu dira oraingo an ere. Baina ezin bigarren bat egin nobedaderik gabe, eta oraingo fitxatu nagusiak Jared Harris eta Noomi Rapace dira. Rapace, hain zuzen, Lisbeth Salanderren rolean (Millenium) ezagun egin den aktore gaztea da.

Sherlock Holmes: A Game of Shadows filmean, detektibeak Londrestik atera beharko du, eta Europan barna bidaiatu: Frantzia, Alemania, Suitza... Hori guztia, James Moriarty gaizkile arriskutsuaren atzetik. Gauza harrigarriak gertatzen ari dira munduko hainbat lekutan, itxuraz elkarrekin loturarik ez dutenak, baina Holmesen susmoa da Moriarty horien atzean dagoela.

Diseinuzko Sherlock Holmes berriak harrera ezin hobea izan du AEBetan, estreinatu zen astean gehien ikusitako filmen lehen postuan jarri zen, Tom Cruise eta haren ezinezko misioaren aurretik. Horiek horrela, sailak ez du etenik izanen, eta dagoeneko Holmes eta Watsonen berria iragarri dute 2014rako. Hori bai, zuzendaria Ritchie izango ote den ez dute oraindik zehaztu.

'SHERLOCK HOLMES: A GAME OF SHADOWS'

Zuzendaria. Guy Ritchie.

Aktoreak. Robert Downey Jr., Jude Law, Noomi Rapace, Stephen Fry, Rachel McAdams, Jared Harris, Kelly Reilly, Geraldine James.

Herrialdea. AEB.

Urtea. 2011.

Iraupena. 129 minutu.

Estreinaldia. Bihar estreinatuko dute Hego Euskal Herrian eta 25ean, Ipar Euskal Herrian.