'The Next Three Days'. 'También la lluvia'. 'Life as We Know It'

Zuzendaria: Paul Haggis. Aktoreak: Russell Crowe, Elizabeth Banks, Liam Neeson, Olivia Wilde, Jonathan Tucker. Herrialdea: AEB. Urtea: 2010. Iraupena: 122 minutu.

Gidoilari prestigioduna da Paul Haggis, besteak beste, Clint Eastwoodentzat idatzi dituen hainbat pelikulari esker. Orain dela zazpi urte zuzendari lanetan aritzea erabaki zuen, eta ezin hobeto atera zitzaion jokaldia: Crash urteko pelikula izan zen Oscar sariak banatzen dituztenentzat. Irakeko gatazkaren ondorioak ikertu ondoren, hemen da Haggisen erregistro berria, thriller bat egin baitu estatubatuarrak. Berez, 2008an Fred Cavayek zuzendu zuen Pour elle filmaren remake-a da The Next Three Days, eta izen potoloak izan ditu ondoan zuzendariak: Russell Crowe, Elizabeth Banks eta Liam Neeson. Lehenengo biak senar-emazte dira pantailan, ustez harreman zoriontsua dute eta Luke izeneko seme bat. Bizimodua guztiz aldatuko zaie, emazteari hilketa bat egin izana leporatuko baitiote. Hogei urteko espetxe zigorra ezarriko diote. Haren senarra guztiz konbentzituta dago emaztearen errugabetasunaz, eta kosta ahala kosta hori frogatzen ahaleginduko da.

Zuzendaria: Iciar Bollain. Aktoreak: Luis Tosar, Gael Garcia Bernal, Raul Arevalo, Karra Elejalde. Herrialdea: Espainia. Urtea: 2010. Iraupena: 104 minutu.

Seigarren pelikula du Iciar Bollainek. Aurrekoak, Mataharis -ek, ez zuenbatere harrera ona izan, eta akaso horregatik erregistroa aldatzea erabaki du espainiarrak. Zinema zinemaren barruan azpigeneroko istorioa da También la lluvia, eta Bolivian dago girotuta. Herrialde horretara bi zuzendari heldu dira, Kolonen inguruko film bat filmatzeko asmoz. Biek abiapuntu diferentea dute; batak Kolonen gaineko ikusmolde kritikoa garatu nahi du; besteak, film komertziala egin. Horretan ari direla, uraren gerra delakoak eztanda egingo du, eta fikzioa eta errealitatearen arteko muga desagertuko da. Kolonek utzitako arrastoak bizi-bizirik segitzen duela ikusteko aukera izanen dute. Filmak Espainia ordezkatuko du Oscar sarietan.

Zuzendaria: Greg Berlanti.Aktoreak: Katherine Heigl, Josh Duhamel, Christina Hendricks, Josh Lucas, Jean Smart, Melissa McCarthy, Faizon Love, Majandra Delfino. Herrialdea: AEB. Urtea: 2008. Iraupena: 112 minutu.

Komediaren eta dramaren arteko uztarketa korapilatsuan murgiltzea aukeratu du Greg Berlantik bere bigarren film luzean. Hamaika urte dira lehena egin zuenetik, gerora telebista munduan aritu da buru-belarri, eta hainbat telesail arrakastatsu sortu ditu. Pelikulako protagonistak bi gazte ezkongabe dira, emakumezkoa eta gizonezkoa. Ez dute aparteko ardurarik hartu nahi bizitzan, eta nahiko ongi daude dauden moduan. Baina egun batean bizimodua goitik behera aldatuko zaie, bien lagunik onenak istripu batean hilko dira, eta haien semearen ardura hartzera behartuta egonen dira. Hortik aurrera, haien bizimodu lasaia guztiz korapilatuko da.