Nafarroako Unibertsitatearen Museoaren eraikuntza bukatu dute guztiz, eta 2015eko urtarrilean inauguratuko dute ofizialki. Hiru soilaru, 12 erakusketa gela eta 700 eserleku baino gehiago dituen antzoki bat biltzen ditu.
Hedabideen aurrean aurkeztu du bere lana Moneok. "Pozik" agertu da emaitzarekin: "Paisaiarekin lotura duen eraikina da; ez da objektu modura hartzen, baizik eta inguratzen duen horrengan ere eragina izaten ahalegintzen da".
Moneoren arabera, ez da margolanetara mugatzen den museo bat, askotariko beste hainbat jarduera ere egingo baitira han. Unibertsitateak eta hiriak "gozatuko" duten kulturgune izatea espero du. Margolanen artean, Picasso, Kandinsky, Chillida, Tapies, Rothko, Palazuelo eta Oteizaren lanak ikusi ahal izango dira.
Aurreikusi dutenez, lehen urtean 107.000 bisitari izango dituzte.
