ZINEMA. Asteko estreinaldiak

'STONE'

ZUZENDARIA: JOHN CURRAN. AKTOREAK: ROBERT DE NIRO, EDWARD NORTON, MILLA JOVOVICH, FRANCES CONROY. HERRIALDEA: AEB. IRAUPENA: 105 MINUTU.

Argi dago Robert De Niro ez dagoela bere momentu artistikorik onenean, eta Scorsesek ez badio aurki eskua luzatzen, erretiroa bigarren mailako roletan ailegatzen ahal zaio. Honetan, enegarren aldiz, polizia batena egin du; haren ondoan, itzaltzen ari den beste izar iragankor bat dago, Edward Norton. Biak eskola berekoak dira, eta biei gustatzen zaie pertsonaia bereganatzea; hortik etortzen ahal da filmaren interesgunerik handienetako bat. De Niro poliziak kartzelan dagoen Norton piromanoa ezagutuko du. Kosta ahala kosta kartzelatik atera nahiko du Nortonek, eta ez zaio inportako emaztea baliatzea xede hori lortzeko.

'L'ARNACOEUR'

ZUZENDARIA: PASCAL CHAUMEIL. AKTOREAK: ROMAN DURIS, VANESSA PARADIS, JULIE FERRIER. HERRIALDEA: FRANTZIA. IRAUPENA: 105 MINUTU.



Komedia atsegina da, eta Frantziako aktorerik ezagunenetakoek parte hartu dute. Hortaz, ez da batere harritzekoa herrialde horretan izan duen arrakasta handia. Bi anai-arrebak negozio bitxi baina errentagarri batean lan egiten dute: bikoteak bereiztea da haien zeregina. Ez dute sekula huts egiten, mundu osoan ibiltzen dira jasotako mandatuak betetzen. Soil-soilik urrezko bi arau errespetatu behar dituzte: bikote egonkorren eremuan ez sartzea eta inorekin ez maitemintzea. Baina arau horiek apurtuko dituzte gizon baten alaba senargaiarengandik bereizteko mandatua jasotzean.

'HÉROES'

ZUZENDARIA: PAU FREIXAS. AKTOREAK: ALEX BRENDEMUHL, EVA SANTOLARIA, EMMA SUAREZ. HERRIALDEA: KATALUNIA. IRAUPENA: 105 MINUTU.



Pertsonaia nagusiak haurtzaro eta gaztarora begira jarri ditu Pau Freixasek bere bigarren film luzean. Publizitate munduan arrakasta handiz lan egiten duen gazte batek motxila ziztrin batekin bidaiatzen ari den emakume bat ezagutuko du. Ekipaje txiki horrekin mugitzen den pertsona horrekiko interes bizia piztuko zaio. Bizimodu zeharo diferentea izan arren, bien artean harreman berezia sortuko da.