ZINEMA. Asteko estreinaldiak

'DESPICABLE ME'

ZUZENDARIAK: PIERRE COFFIN, CHRIS RENAUD, SERGIO PABLOS. HERRIALDEA: AEB. IRAUPENA: 95 MINUTU.

Gaur egun animazio arloan oso zaila da, ezinezkoa ez esatearren, Pixar etxeak duen nagusitasunari aurre egitea. Dreamworks saiatu izan da, baina nekez lortu du hurbiltzea. Orain, ekoiztetxe txiki batek ekarri du hurrengo proposamena. Gru maltzurra egiten ahal den gaiztakeriarik handiena ari da prestatzen: ilargia lapurtzea. Ideia ez da harena izan, amarena baizik, zeina are gaiztoagoa baita. Planak aurrera egiten duen bitartean, Gluk ustekabeko zeregin bat aurkituko du: hiru arreba umezurtz zaintzea. Jatorrizkoan, Steve Carrell eta Julie Andrewsek jarri dituzte ahotsak.

'LETTERS TO JULIET'

ZUZENDARIA: GARY WINICK. AKTOREAK: AMANDA SEYFRIED, VANESSA REDGRAVE, GAEL GARCIA BERNAL, FRANCO NERO. HERRIALDEA: AEB. IRAUPENA: 105 MINUTU.



Izenburuari eta kartelari erreparatuta, ez dago zalantza izpirik: aurtengo hamaikagarren komedia erromantiko eztia da Letters to Juliet. Hortaz, ez da harritzekoa Gary Winnicken izena ikustea zuzendariaren rolean, horrelakoetan trebatu baita zinemagile grisa. Protagonisten rolean oso izaera diferentea duten bi aktore gazte ditugu: Seyfield eta Garcia Bernal. Bikote dira eta oporraldi batean Italiara eginen dute. Han daudela, oker baten ondorioz, Julieta izeneko batentzako karta bat jasoko dute. Berez iraganeko maitalearen bila ari den emakumezko batek idatzi du gutuna.

'SAW VI'

ZUZENDARIA: KEVIN GREUTERT. AKTOREAK: TOBIN BELL, COSTAS MANDYLOR. HERRIALDEA: AEB. IRAUPENA: 90 MINUTU.



Harry Potterrekin lehia bizian da Saw saila, ea nork gehiago iraun. Sinesgaitza badirudi ere, Saw-en jarraitzaileak ez dira nekatu; leihatila datuek erakusten dute oraindik ere oso frankizia errentagarria dela. Hoffman detektibeak Jigsawen oinordeko bihurtu da, eta haren joko krudelarekin segituko du. Nolanahi ere, interesgarriena ez da sinopsia, inguruan izan duen polemika baizik. Iaz, Espainiako Kultura Ministerioak X sailkapena eman zion filmari, zeukan biolentzia aitzakia hartuta. Areto arruntetan estreinatu ahal izateko, lau minutu inguru kendu behar izan dizkiote.