'Intouchables'
Zuzendariak: Olivier Nakache, Eric Toledano. Aktoreak: François Cluzet, Omar Sy, Anne Le Ny, Audrey Fleurot, Clotilde Mollet, Josephine de Meaux. Herrialdea: Frantzia. Urtea: 2011. Iraupena: 109 minutu.
Iazko Donostiako Zinemaldiari amaiera eman zion filma da. Arrakasta handia izan du Frantzian Intouchables-ek, eta, besteak beste, Omar Syk aktore onenaren Cesar saria eskuratu du. AEBetako buddy movies generoaren moldaketa frantziarra da istorioa. Egoera eta espazio bera konpartitu beharko dute elkarrekin deus ikustekorik ez duten bi pertsonaiak: bere kabuz moldatu ezin duen gaixo batek eta haren zaindaria izatea egokituko zaion gazte pobre eta axolagabe batek. Bien arteko harremanak egoera bitxiak sortuko ditu, eta horiek dira Toledano eta Nakachek idatzi duten komedia honen oinarri nagusia.
'De tu ventana a la mía'
Zuzendaria: Paula Ortiz. Aktoreak: Maribel Verdu, Leticia Dolera, Luisa Gavasa, Roberto Alamo, Fran Perea, Cristina Rota, Pablo Rivero, Alex Angulo. Herrialdea: Espainia. Urtea: 2011. Iraupena: 107 min.
Paula Ortiz zuzendari espainiarraren lehen film luzea da De tu ventana a la mía; bera da gidoiaren idazlea ere. Horretan, hiru istorio gurutzatu ditu elkarrekin; hiru paisaia, hiru garai, hiru emakume. 20ko, 40ko eta 70eko hamarkadetan gertatuko dira istoriook, eta horietan guztietan amodioa da protagonisten —Ines, Violeta eta Luisak— arteko lokarri nagusi komuna. Bakoitzak bere modura ezkutuan gorde behar izan du maitasun nahia, harik eta gertaera batek horiek guztiak azalera ekarriko dituen. Seminci zinemaldi ezagunean zuzendari berriaren saria irabazi zuen Paula Ortizek.
'This Means War'
Zuzendaria: McG. Aktoreak: Reese Witherspoon, Chris Pine, Tom Hardy, Til Schweiger, Chelsea Handler, Angela Bassett. Herrialdea: AEB. Urtea: 2012. Iraupena: 98 minutu.
Disko jartzaile baten goitizena darabilen arren, zinema zuzendaria da McG. Bereak ditu Charlie´s Angels-en bi pelikula eta Terminator berpizteko azken saioa. Oraingoan, espioitza munduan girotutako komedia batekin dator zuzendari estatubatuarra, eta, nola bestela, Reese Whiterspoon izan du protagonista. Lauren Scottena egiten du; bere lan jardueran onena omen da, baina arazoak ditu gizonezkoekin harremanak hasteko orduan. Kontaktu webgune batean izena eman, eta ohartzerako aldi berean bi gizonekin ateratzen ari da. Biak lagun minak dira, espioi lana egiten dute CIAn eta haien adiskidetasuna guztiz hondatuko da.
