'Journey 2: The Mysterious Island'
Zuzendaria: Brad Peyton. Aktoreak: Josh Hutcherson, Vanessa Hudgens, Dwayne Johnson, Michael Caine, Kristin Davis, Luis Guzman, Fileena Bahris, Michael Beasley. Herrialdea: AEB. Urtea: 2012. Iraupena: 105 minutu.
Orain dela hiru urte Eric Brevig zuzendariak Journey to the Center of the Earth film kaskartxoa egin zuen. Film horren berezitasun nagusia hiru dimentsiotan izatea zen, orduan oraindik nahiko bitxia zen kontua. Nonbait, esperimentua ez zen oso gaizki atera. Hori izan da haren bigarren zatia egiteko arrazoi nagusia, berriro ere 3D-aren teknika baliatuta. Seanek laguntza eskari bat jasoko du mapetan agertzen ez den uharte misteriotsu batetik; beste mundu batetik etorri den izaki bat dirudi. Hara abiatuko dira Sean eta lagunak.
'The Woman in Black'
Zuzendaria: James Watkins. Aktoreak: Daniel Radcliffe, Ciaran Hinds, Roger Allam, Sophie Stuckey, Janet McTeer, Shaun Dooley. Herrialdea: Britainia Handia. Urtea: 2012. Iraupena: 95 min.
Eskola zaharreko beldurrezko filma da The Woman in Black. Istorioa nahiko ezaguna da: Arthur Kipps abokatu gaztea da, eta hilberri den bezero baten etxetzarra saltzera abiatuko da. Hara ailegatuta, zerbait misteriotsua badela ohartuko da. Bizilagunek ez dute etxeaz hitz egin nahi, eta ez dira hara hurbiltzen. Nonbait, inguru horretan beltzez jantzitako emakume bat ibiltzen da. Kippsek berak ikusi du, baina inork ez dio haren berririk eman nahi. Harry Potterren mundua lehenbailehen atzean utzi nahi duen Daniel Radcliffe gaztea da film britainiar honetako protagonista.
'The Grey'
Zuzendaria: Joe Carnahan. Aktoreak: Liam Neeson, Dermot Mulroney, James Badge Dale, Frank Grillo, Nonso Anozie, Dallas Roberts. Herrialdea: AEB. Urtea: 2012. Iraupena: 117 minutu.
Beste behin ere sufritzea tokatuko zaio Liam Neeson gaixoari. Oraingo honetan hotza eta otsoak izanen ditu arerio. Petrolio bila ari den talde bateko kidea da, eta haren lagunak daramatzan hegazkinak istripua izanen du Alaskako paraje galdu batean. Bizirik atera diren bidaiariak ez dira oso egoera onean: hotzari eta goseari aurre egin beharko diete, norbait haien bila ailegatu bitartean. Hori gutxi balitz bezala, otso talde bat abiatuko da haien atzetik. The A-Team telesailaren zinemarako bertsioa izan zen Joe Carnahan zuzendariaren aurreko filma.
