'We Bought a Zoo'
Zuzendaria: Cameron Crowne. Aktoreak: Matt Damon, Scarlett Johansson, Elle Fanning, Carla Gallo, Patrick Fugit, Thomas Haden Church. Herrialdea: AEB. Urtea: 2011. Iraupena: 124 minutu.
Orain arte Cameron Crowneren pelikulek harrera nahiko ona izan dute, Almost Famous lanak bereziki; oraingoan zuzendariak erregistroa guztiz aldatzea erabaki du, eta familia osoarentzako film atsegina egin. Hortaz, oso pelikula aproposa da Gabonetako egun hauetan estreinatzeko. Gainera, gaur egun jarraitzaile gehien duten aktoreetariko bi dira protagonistak: Matt Damon eta Scarlett Johansson. Benjamin Bee idazleak norabide aldaketa egin nahi du bere bizimoduan, eta, horretarako, landetxe bat erosiko du Los Angelestik urrun. Hara eginen du familia osoak, baina etxeak sorpresa atsegina du; zoo zahar bat du. Familia zoo hori zaharberritzen saiatuko da.
'The Change-Up'
Zuzendaria: David Dobkin. Aktoreak: Jason Bateman, Ryan Reynolds, Olivia Wilde, Alan Arkin, Leslie Mann. Herrialdea: AEB. Urtea: 2011. Iraupena: 112 min.
Zaila da komediarik gabeko Eguberririk imajinatzea,eta hutsune hori betetzera dator Dobkin. Ez da, baina, batere film ganberroa; nahikoa topikoa da The Change-Up-ek duen abiapuntua. Mitch eta Daves lagun-minak izan ziren gaztaroan, baina gerora bakoitzak bere bidea hartu zuen. Dave abokatua da; ezkonduta dago, eta hiru seme-alaba ditu. Mitchek, ordea, ezkongabe segitzen du, eta ez du heldutasunera ailegatzeko modurik aurkitu. Batak besteak duena desiratzen du, eta alderantziz. Bi lagunek eginen duten mozkorraldi batean, gauza harrigarria gertatuko da: haien bizitzak trukatuko dira. Orduan deskubrituko dute besteak duena ez dela uste bezain desiragarria.
'XP3D'
Zuzendaria: Sergi Vizcaino. Aktoreak: Maxi Iglesias, Amaia Salamanca, Luis Fernández, Ursula Corbero, Oscar Sinela, Alba Ribas. Herrialdea: Espainia. Urtea: 2011. Iraupena: 89 minutu.
Espainiako zinema ez dago momenturik gozoenean. Azken urteotan, genero fantastiko eta telebistako aktore ezagunen uztarketatik etorri zaizkio pelikularik errentagarrienak, nahiz eta horien kalitatea normalean kaskar samarra izan. Honako hau formula bera errepikatzeko hamaikagarren saioa da. Psikiatria talde bat da protagonista, ez dute sinesten fenomeno paranormalik badenik. Baina, horri aurre egiteko, fakultateko irakasleetariko batek proposamen bitxia eginen die: frogatu egin beharko dute benetan halakorik ez dela. Horretarako, Susurro izeneko herrira joko dute, eta hango meatzeetan zer gertatzen den ikertuko dute.
