ZINEMA. 'Guerrilla' Soderberghek Cheri buruz egindako filma dago ikusgai

Ernesto Guevara Che iraultzaile argentinarraren ikonoaren inguruko «behin betiko filma» ondu du Steven Soderberghek Che lan pertsonalean. Halaxe saldu zuten filma Cannesen, iazko maiatzean. Lau ordu eta erdiko iraupenarekin «lan sakona» egin nahi izan du Soderberghek. Cannesen osorik eman zuten, baina areto komertzialetara bi zatitan iritsi da, bi filmetan. Duela hilabete batzuk El argentino eman zuten, eta gaurtik aitzin Guerrilla jarriko dute ikusgai Hego Euskal Herrian. Lapurdin duela aste batzuk estreinatu zuten, ia-ia lehenengo zatiarekin batera, eta oraindik ikusgai dago Miarritzen.

Benicio Del Torok egindako Cheren interpretazioa nonahi goraipatu dute -gizonezko aktore onenaren saria jaso zuen Cannesen-, baina filmak pertsonaia historikoaz egiten duen kontakizunak kritika gogorrak ere jaso ditu. Del Torok eta Soderberghek eskuz esku egin zuten lan proiektu horretan. Zinemagileak aparteko interesarekin ekin zion proiektuari. Zazpi urte behar izan zituen Cheren bizitzari buruzko informazio zehatza biltzeko, gidoia idazteko eta lan biak filmatzeko. Del Torok ere interes berezia zuen filmean, Cherena egiteaz gain filma ekoitzi baitzuen.

«Herri oso baten historia»

«Ez zara ari pertsonaia batez bakarrik; Cherekin, herri oso baten historiaz ere ari zara. Halaber, ez da fikziozko pertsonaia, egiazkoa baizik. Halakoetan alderdi denak ondo landu behar dira filmatzen hasi aurretik; ez du balio bidean ezer asmatzea, inprobisazioak ez du lekurik halakoetan». Del Torok bere pertsonaiari zer-nolako garrantzia ematen dion ikusteko argigarriak dira hitzok.

Soderberghen filmak 1955. urteko uztailaren 13a du abiaburu. Orduan ezagutu zuten elkar, Mexiko Hirian, Ernesto Guevara Che mediku argentinarrak eta Fidel Castro abokatu kubatarrak. Egun hartan jaio zen Kubako iraultza. Eta egun hartatik da ezaguna Ernesto Guevara Che gisa.