Bart gauean etxe batek su hartu du Gasteizen, eta han bizi ziren bi familiek eraikina utzi behar izan dute. Korazonisten kalean piztu da sua, 00:40an; taxista batek ohartarazi die larrialdi zerbitzuei, eta udaltzainek eman diete bizilagunei etxetik ateratzeko abisua. Gasteizko Udalak jakinarazi du lo zeudela denak, sua piztua zenik jabetu gabe.
Suaren eraginez, eraikinaren teilatua erori egin da. Gasteizko suhiltzaileek jakinarazi dute 11 pertsona atera direla eraikinetik, onik. Gasteizko Udalak, berriz, bederatzi direla esan du, eta bi adingabe daudela tartean. Guztiak beste etxe batzuetara eraman dituzte. Udalak azpimarratu du bizia salbatu dutela horiek denek gaur.
