Atxartetik abiatu, eta Gure Kristo Atxartekoa baselizaren ondotik igaroko gara, hormigoizko errei batetik gora eginez, bikoizketa bateraino; ondoren, PR BI 86ren norabidearen atzetik, Txakurzuloraino jarraituko dugu pistatik. Lizarren eta haritzen artean paseatu, eta, metro gutxiren buruan, ezkerretik adierazitako desbideratze batera iritsiko gara, PR BI 85etik Guenzelairantz. Harekin bat egingo dugu, erreia utzi eta bidezidor batean gora eginda, Atxurtuko ezproien azpian hazitako basorantz.
Atxarte edo Mendiolako amildegi basotsuan gora egin, eta Untzillatxeko ertz inklinatuak (934 metro) atzean utziko ditugu, baso misto batean sartuko garelarik, hasierako pagadi batekin eta ondorengo pinudiarekin. Pinudira iristean, bidezidorra baso-ustiapenerako bide zabal batengatik aldatuko dugu, antzeko xendrak biltzen dituen bidegurutze batera iritsiko gara, hogei metro zuzen jarraituko dugu, eta ezkerreko adarkaduratik abiatuko gara, PR BI 85 errepidea utzita. Bihurgunea hartu bezain laster, eskuinaldean mugarri bat duen bidezidor bat topatuko dugu, eta hortik igo gaitezke, edo pixka bat gorago irekitako eskuineko basabidearen adarkaduratik ere jo dezakegu, bi bideek bat egiten baitute pinudiaren goiko aldean.
Gainetik, Artolako mendi lepoa agertzen da, Alluitz eta Astxiki artean hertsatua. Harantz joko dugu, eta zuzenean igoko gara bide handiago bat duen lotune bateraino, zeinean PR BI 85ekin bat egingo dugun berriro. Mendi hegal inklinatuaren goialdea gainditu ondoren, Artolako lepora iritsiko gara. Han, eskuinera egin, eta zuzen igoko gara, hogeita hamar bat metro gorago dagoen bidezidor batekin bat egin arte, eta, ezkerrera biratuz, mendiaren ekialdeko magalean jarriko gara.
Ondoren, mugarriz eta baliza horiz markatutako bidezidorrak eskuinera egiten du, eta harritza batek estalitako kanal batetik bideratzen da igoera. Hori gaindituta, Atxondo ibarreko paisaia irekitzen da. Handik, mendi magala oso zuzen igotzen da, harkaitz mailen artean, Alluitzera (1.040 metro) ematen duen gailurreraino igo arte.
Infernuzubiko pasabidea
Hantxe hasten da ibilbiderik interesgarriena. Gailurretik barrena jarraituko dugu, Galdarea izeneko ondoko gailurrera doan zubi harritsu batetik, eta handik beheranzko tximinia estu batean sartuko gara Infernuzubiraino: harrizko pasabide estu bat da, eta Atxarteko amildegira begira dago. Bertan, alde horretara egingo duen edozein maniobra alboratu behar dugu, eta, pasabidea saihesteko jaitsi behar izan gabe, bavaresa erara zeharkatuko dugu: besoekin zubi harritsuaren goiko aldera oratuz, eta oinak eusteko erlaitzak bilatuta.
Pasabidea igarota, ertza gainditzen dugu korridore estu batetik edota eskumako pitzadura eta presadun xaflatik gora eginda, gailurrari berriro heldu, eta Larrango Puntie tontorrera sartuko gar. Hamar bat metro aurrerago, ezkerrera egin, eta Urkuluko lepora jaitsiko gara, zeinak bi kanalen arteko beste zubi bat zabaltzen duen. Hura igarota, hamar bat metroko bidezidor bat hartuko dugu, eskuinera biratu, eta harri eta belar artean gora. Gorenera iritsi gabe, ezkerrera egingo dugu, eta diagonal mailakatu bat marraztuko dugu Urkulu puntaraino.
Mendi burutik aurrera jarraituko dugu, hura metro batzuk gaindituz ezkerretik edo eskuinetik, gailurraren gorenera itzuli arte. Larrano mendilerroko hiru irtengune txiki atzean utzi, eta laugarrenera igoko gara: Larrano punta. Atzeko mendi lepora jaitsi, bi borda eta Santa Barbara baselizaren ondotik igaro, eta berriro gora egingo dugu; orain, belardi etzanetik, hesiaren eskuinaldetik, Kurutzetako harrizko ertzaren azpian hazitako pagadi batera iristen dena. Gailurrera iristeko, mugarrizko bidexka harritsua hartuko dugu, aipatutako ertzaren beste aldean dagoena.
Anbotoraino heldu aurretik doan gandorrak ez du berebiziko zailtasunik, zabala da, eta katuka jaitsi beharrik izan gabe ia. Horrela, Elgoinera iritsiko gara, eta gailurrean dagoen punta txiki bateraino jarraituko dugu: Zaitze puntea. Eskuinetik jo, eta Agindi bigarren mailako muinora igoko gara. Ondoren, Pagazelaiburutik datorren bidezidorrarekin bat egingo dugu, eta igarobide harritsua Anboton (1.331 metro) amaituko dugu.
Anbototik irtengo gara, iritsi garen kontrako muturretik; ezkerretara iparraldeko ertza utziko dugu, eta, horren ondoren, eskuinetara begiratuko dugu, pintura gorriz eta zuriz balizatutako bidezidor bat aurkitu arte. Handik, hegoaldeko magala arrokatsuan behera jaitsiko gara, eta Zabalandiko belardietara zuzenean heldu. Mendi lepora iritsi gabe, eskuinera egin, eta pagadiaren pistara joko dugu. Handik, Jai Lekuko bordaren ondotik igaro, eta igoerari ekingo diogu berriro.
Pagadiko zabalgune batera iristean, eskuinera egingo dugu, GR 12a Asuntzarantz seinalatzen duen idazkunaren atzetik. Pagazelaiburuko lepora igo, eta pistatik jarraituko dugu, Asuntzaraino, non PR BI 85a hartuko dugun, Atxarterantz. Bidezidor balizatuaren barrena, ibilaldi erosoa egingo dugu, basotsua zati batzuetan, egin dugun gailurraren murruaren azpitik. Amilla iturriaren ondotik igaro, eta hasierako bidearekin bat egin arte jaitsiko gara, eta Atxartera bueltatu.
