Etxaldeko plazatik (820 m) Orbaizeta herrirako errepidea hartu dugu, berehala Legartza erreka gurutzatu eta olaren hondarren atzealdetik doan bidetik jarraitzeko asmoz. Ganadu eraikuntza atzean utzi, eta Itolatz sakanean gora doan pista hartu beharrean, zutoin adierazlearen parean abiatzen den zidorretik jo dugu, SL NA 59 ibilbideko marka berde-zuriak lagun. Gora bidean soilgunetik pagadiko hostailaren gerizpera igaro, eta laster iritsi gara Arlekiako gotorrera daraman bidegurutzera. Ezkerrera hartuz, pagadiak ezpeldoiari leku egin, eta Alargainetik datorren gandor luzearen muino batean dagoen harrizko gotorleku batera heldu gara (1.005 m). Hondakinak izan arren, artean antzeman daitezke ola defendatzeko asmoz eraikin gotorra osatzen zuten hainbat horma eta lubaki. Larraun auzoaren eta Mendilatz eta Berrendiko basoen ikuspegi ederra eskaintzen du begiraleku honek.
Arestiko bidegurutzera itzuli, eta mazela erdian gorantz doan bidezidor garbitik jarraitu dugu, eta Arlagain harritsuaren parean, gainaldera irten gara (1.040 m). Pagadien itzaletik gandorraren hego hegiko belaze batzuetara irten, eta, horiek inguratuz, pista baten amaierara heldu gara. Ezkerretik abiatzen den bidetik jarraitu dugu, aurrerantzean ere marka berde-zuriak gidari. Pinu gorri eta alertze artean, malda behera leunean, bidegurutze batera iritsi gara. Ezkerrera egin dugu han erreka-zoko bat inguratuz, eta Latxagako ordokietatik datorren bidearekin bat egin dugu. Ehiztari aterpe berde kamuflatu bat eskuinean utzi, eta malda behera leunean pista-gurutze batera heldu gara. Nabala lepoa da (1.030 m). Hiru pista elkartzen dira hor, Orbaizetako olatik Itolatz sakanean barrena datorrena, Aztapar sakanean behera Orbarara jaisten dena eta Orreagara doana.
Pista zeharkatu, eta Otsolezea gandorraren hego hegian gora abiatzen dena hartu dugu. Laua hasieran, eskuinera irteten den baso-pista utzi, eta bide zahar malkartsu batetik, zuzen-zuzen gora igotzeari ekin diogu. Bihurgunea eman, soilgunetik pagadian barneratu, eta bide garbirik gabe, zuzenean gora gandorrera irten gara. Gandor zabalean gora punturik garaiena hartu eta Ortzanzurietarekin lotzen duen lepora jaitsi gara, elur laprasta zahar batzuk saihestuz, eta txilar, ote eta goi larrez jantziriko bizkar luzean gora dugu tontorra(1.567 m). Ikuspegiak apartak dira: Euskal Herriko gailur garrantzitsuenetatik, Adi, Autza, Aizkorri, Aralar... Pirinioetako lehen gailurretara. Ebroko sakonunetik Aturriren iparrera.
Itzulera, Txangoa eta Itolatz erreken arteko bizkar luzean behera egin dugu. Ote eta txilar artean, soilgunetik lehenik, harritza guneetatik ondoren eta pagadipeko orbela artean azkenik. Tentuz, Murukoa deitu tontorra baino lehen zabaltzen den lepora jaitsi gara (1.180 m). Eskuinera egin, eta zidor lauso batzuetatik behera, hainbat txondor plaza igaro ondoren harrobi zahar bateraino doan pistan bukatu dugu. Olarainoko azken urratsak Itolazko erreka ondoko pistatik egin ditugu.
