Brexit-a gauzatzeko EB Europako Batasunaren eta Erresuma Batuaren arteko negoziazioak bigarren fasera sartzear daude, eta etorkizuneko erlazioa jorratuko dute horietan. Bitartean, 2019ko martxoan Erresuma Batuak batasuna utzi ondoren hasiko den trantsizio epea amaitzeko data proposatu du Michel Barnierrek: 2020ko abenduaren 31. "Europako Batzordearen ikuspegitik epe hori amaitzeko data logikoena 2020ko abenduaren 31 da, urteetako esparru finantzarioa bukatzen den data baita", azaldu du Barnierrek.
Erresuma Batuko lehen ministro Theresa Mayek, berriz, epeak irteera gauzatzen den momentutik bi urte irautea nahi du, hau da, 2021eko martxora arte. Beraz, bi aldeek akordio bat lortu beharko dute. Bruselak 2018ko urriarako amaitu nahi ditu negoziazio guztiak: trantsizio epearen baldintzak eta etorkizuneko harremanak.
Trantsizio eperako hainbat gako ere ezarri ditu EBren negoziatzaileak. Barnierren esanetan, aduana batasunak bere horretan jarraituko du, eta Erresuma Batuak epe horretan batasunak onartzen dituen arauak errespetatu beharko ditu. "Ez da kartara eginiko trantsiziorik egongo", adierazi du.
