Hamalau lagun hil dituzte gaur eguerdian Marrakexko (Maroko) kafetegi batean izandako leherketan, eta beste 23 zauritu egin dira. Marokoko Barne Ministerioaren arabera, atentatua izan da. "Dauzkagun datu guztiengatik, ekintza kriminal antolatua izan dela esan behar dugu", adierazi du Jalid Naciri Komunikazio ministroak. Albiste agentziek hasieran zabaldu dutenez, gas bonbonak lehertu dira.
Hildakoen artetik 11 atzerritarrak dira; sei, frantziarrak.
Djema el Fnaa enparantza ezagunean dago kafetegia. 'Argana' izena du. Reuters argazki agentziako argazkilari batek adierazi duenez, leherketa izan den unean kafetegia beteta zegoen. Inguru hartan Marrakexera joaten diren turista asko egoten da.
