Gabarra bat zamatzeko lanetan ari zirela, garabia irauli da Galapago uharteetako (Ekuador) San Cristobal uharteko kaian, eta gabarra bat hondoratu du. Gabarrak 2.000 litro diesel erregai zituen barruan, eta horrek larrialdia eragin du. Izan ere, lekua Munduaren Ondare izendatua du Unescok, eta munduko ekosistemarik aberats baina hauskorrenetako bat da. Izan ere, uharte horietara 1831. urte aldean eginiko bidaian ikusitako espezie aniztasunak eman zion eboluzioaren ideia Charles Darwin naturalistari. «Erregaia isuri dela ikusi dugu, eta gabarraren eskifaiako kideek uretara egin dute jauzi, euren bizitzak salbatzeko» esan du Ekuadorko Segurtasun Zerbitzuak.
Gobernuak «larrialdi protokoloak» jarri ditu martxan, eta isuria kontrolatzeko barrerak eta xurgatzeko gaiak zabaldu dituzte gunean. «Egoera kontrolpean dago», esan du Quitoko gobernuak.
