Apirilaz geroztik Italia eta Greziako kostaldera heldutako 40.000 immigrante Europako Batasuneko herrialde ugariren artean banatzea proposatu du Europako Batzordeak. Alemaniak, Frantziak eta Espainiak hartu beharko lituzkete immigranteen erdiak, eta beste erdiak beste hogei estaturen artean banatu beharko lituzkete. Banaketa horretatik kanpo leudeke Erresuma Batua, Irlanda eta Danimarka.
"Aurrera egiteko erabaki irmoa dugu. Espero dut herrialdeak eta Europako Parlamentua prest egotea gurekin aurrera egiteko", esan du Europako Batasuneko Immigrazio komisario Dimitris Avramopoulosek.
Horrela, maiatzaren 13an iragarritako neurriari eutsi dio Europako Batzordeak. Orduko hartan, kuota bidezko sistema bat proposatu zuen etorkinak banatzeko, immigrante gehien jasotzen dituzten estatuen "karga arintzeko".
Gaur egun, Greziak, Maltak eta Italiak jasotzen dituzten etorkin gehien, Afrika iparraldetik eta Ekialde Hurbiletik datozen asko bertatik sartzen direlako Europako Batasunera. Nolanahi ere, babes eskaera gehien Alemaniak eta Suediak jasotzen dituzte. Iaz 214.000 pertsonari onartu zitzaien asilo eskubidea, eta kasu horietatik %26 eta %18 bi herrialde horiek tramitatu zituzten, hurrenez hurren.
