Kanpainan ibili dira igaro egunotan aldekoak eta kontrakoak. Eliza katolikoaren eskutik izan dute oihartzuna kontrako ahotsik gehienek. Abortua «etikoki onartezina» dela ohartarazi dute kalez kale, eta ezezko botoa eskatu diete herritarrei. Apaizek abisu eman diete baiezko botoa ematen dutenei abisu eman diete: eskumikatu egingo dituzte.
Baiezkoaren alde, Gobernuko taldea --PS Alderdi Sozialista--, hainbat emakume talde, eta erakunde ezkertiarrak ari dira. Kalez kale jendea mobilizatzen saiatu dira horiek ere. Izan ere, abstentzioak eragiten die, batez ere, kezka. Eta badute horretarako aski motibo. Ez da hau Portugalen abortuaren inguruan egiten den lehen erreferenduma. 1998an ere egin zen beste bat, eta jendearen parte-hartzea eskasa izan zen. Hautesleen %31,8 baino ez ziren joan boza ematera, eta ezezkoak irabazi zuen alde oso txikiarekin; bozen %50,5 lortu zituen. Oraingoan, aldaketaren alde dauden hautesle guztiak mobilizatu, eta egoera irauli nahi dute baietzaren defentsan ari direnek.
ABORTU LEGEZ KANPOKOAK. Baietzaren aldekoen argudio nagusia datuak dira, egungo legeria aski ez dela erakusten duten datu gordinak: urtean Portugalen 18.000 abortu legez kanpoko egiten direla dio, esaterako,Portugalgo Osasun Ministerioak. Eta beste zenbait iturriren arabera, gehiago ere badira. Egoera kaskarretan egiten dira sarri askotan abortu horiek, eta ondorioz urtean 5.000 emakume inguru artatu behar izaten dituzte erietxeetan.
Abortatzeko hautua egiten duten emakumeentzat epaitegietan sortzen diren egoera zailak saihestu nahi dituzte, legea aldatuta. 1998tik 30 emakume epaitu dituzte Portugalen legez kanpo haurdunaldiak eteteagatik, eta 14ri zigorra jarri diete. Inkesta gehienen arabera, baietza gailenduko da. Baina inork ez du argi.
