Sei hilabetez aritu da Giza Eskubideen Interamerikako Batzordea Ayotzinapako ikasleen desagerketa ikertzen, eta ikertzaile taldeak auzitan jarri du Mexikoko Gobernuak auziari buruz emandako bertsioa. Txosten batean, adituek uste dute Mexikoko Guerrero estatuko Poliziak eta armadak ez zituztela ikasleak babestu, beste ikasle batzuen aurkako erasoen berri bazuten ere.
Claudia Paz batzordeko kideak adierazi duenez, ikasleen kontrako erasoa "gizon batek zuzendu eta koordinatu zuen". Batzorde horren zeregina luzatuko duela jakinarazi du Mexikoko Gobernuak.
Ikasleen senide ugarik eta Mexikoko gizartearen zati batek ez du bertsio ofiziala sinesten, eta hamaika protesta egin dituzte gazteak desagertu zirenetik. Gurasoek ere auzitan jarri zuten bertsio hori, eta, batzordeak txostena argitaratu ondotik, berehala bilera bat egiteko eskatu diote Enrique Peña Nieto Mexikoko presidenteari.
Mario Cesar Gonzalez desagertutako gazteetako baten aitaren esanetan, batzorde horren txostenak Mexikoko Gobernuaren "antzerkia" desegin du. "Ezin dugu onartu existitzen ez den zerbait. Gure seme-alabak dira, eta beren duintasuna zapaldu zuten", erantsi du Emiliano Navarrete gurasoak.
Batzordearen ondorioez hitz egin du Peña Nietok berak. Auziari buruzko ikerketan txostena aintzat hartzeko agindu duela adierazi du.
