Baaz gobernuaren alderdiaz gain, alderdi gehiago sortu ahal izateko legea onartu zuen atzo Siriako Gobernuak. Sana albiste agentziak jakinarazi duenez, lehen ministroaren erreformen artean beste bat da lege berria, eta "boterearen kontrolari alternatibak eskaintzea" du helburu, beste batzuen artean.
Alderdi berriek hainbat baldintza bete beharko dituzte, esate baterako, demokrazia, giza eskubideak eta herrialdearen batasuna errespetatzea eta defenditzea. Gainera, ezingo dute indarkeria babestu eta sustatu, ezingo dute nazioarteko erakundeetako kide izan eta ezingo dute erlijio, tribu eta etnia zehatz batekin identifikatu.
1963tik, alderdi bakarra
1963. urteaz geroztik Baaz alderdiak soilik hartzen du parte hauteskundeetan, eta aurreko astean Bashar al Assad presidentea prest agertu zen alderdi gehiagoren parte hartzea baimentzeko. Horretarako Konstituzioa aldatu beharko du, horrek 8. artikuluan arautzen baitu Baaz dela hauteskundeetan parte hartu dezakeen alderdi bakarra.
Lau hilabete dira Sirian, beste herrialde arabiar batzuetako eredua jarraituz, agintarien aurkako protestak hasi zirenetik, eta Gobernuak gogor zanpatu ditu. Hainbat erakunderen arabera, 1.300etik gora dira hildakoak (horiei 500 polizia gehitu behar zaizkie), eta nazioarteko zilegitasuna kendu dio Al Assad presidenteari. Erreformekin egoera bideratu nahi du Al Assadek.
