Wolfgang Schaeuble Alemaniako Finantza ministroaren arabera, Greziaren proposamenak ez ditu erreskate programaren baldintzak betetzen, "finantziazioaren luzapena besterik ez da. Ez du astelehenean eurotaldean adosturikoa betetzen " .
Reuters berri agentziak zabaldu du Greziak zorra murriztea eta "oreka fiskala" sei hilabetez betetzeko konpromisoa eskatu duela. Bien bitartean, eurotaldeko gainerako bazkideekin negoziatzen segituko luke.
Goizean, eurotaldeko buru Jeroen Dijsselbloemek eman du albistea: Greziak sei hilabeteko luzapena eskatu dio Bruselari.
Received Greek request for six months extension.
— Jeroen Dijsselbloem (@J_Dijsselbloem) February 19, 2015Gerora zehaztasun gehiago eman ditu Greziako Gobernuak berak, nabarmenduz soilik maileguaren luzapena eskatu dutela eta ez erreskatearena: "Gobernuak zintzo jokatu du hartutako konpromisoekin, eta ez du memorandoa luzatzeko eskatu. Herriaren erabakia errespetatzen duen, gizartearen duintasuna defendatzen duen eta, era berean, gure bazkideek onar dezaketen proposamena aurkeztu du".
Trukean, zerga iruzurraren eta ustelkeriaren aurkako eta giza krisiari aurre egiteko neurriak iragarri ditu Atenasek.
Eurotaldeko batzorde berezia gaur bertan hasiko da Atenasen proposamena aztertzen, eta bihar arratsaldean estatu kideetako ordezkariak batzartuko dira azken erabakia hartzeko.
Greziako Gobernuak atzoko agindu zuen proposamen berria, baina, denbora falta argudiatuta, egun bat atzeratu zuen. Dena den, baliteke Atenasen keinua aski ez izatea. Lehen erreakzio publikoek ez dute baikor izateko arrazoi handirik ematen. Vladis Dombrovskis Europako Batzordeko lehendakariordeak gogorarazi zuen astelehenean Eurotaldeko beste ministroek Gianis Varufakisi esandakoa: balio duena erreskatea luzatzea da.
