Nazih Abdul Hamed al Ruqai Abu Anas al-Libi izenez ezaguna tropa estatubatuarrek atxilotu zuten, asteburuan, FBIk eta CIAk gidatuta, eta abokaturik gabe galdekatzen ari dira militarrak, ekintza horretarako propio bidalitako San Antonio itsasontzian. John Kerry AEBetako Estatu idazkariak “legezko ekintza” izan dela esan arren, Libiako behin-behineko gobernuak kritikatu egin du ekintza legez kanpokoa deritzolako. Etxe Zuriak 2000tik dauka Al-Libi zerrenda beltzean, besteak beste, Kenyako eta Tanzaniako AEBen enbaxadetako 1998ko erasoen arduradun delakoan, eta Al-Qaedaren gaineko informazio baliogarria eman dezakeela uste dute informazio zerbitzuek, Osama Bin Ladenen agindupean ustez Sudanen aritu zenetik, gaur egun arte, New York Times egunkariaren arabera.
AEBetako Defentsa departamentuak jakinarazi du “legalki” dagoela atxilotua gerra legearen pean, eta Libiatik kanpoko gune babestu batean dagoela. Komunikatu berean azaltzen du AEBen lehentasunak zein diren: “beti izan da terrorismoagatik susmagarriak atxilotu eta informazio baliotsua lortu ahal izatea, estatubatuarrak babesteko”.
Abokaturik gabe galdekatzeko estrategia gehiagotan erabili izan du Barack Obamaren administrazioak. Ahmed Abdulkadir Warsamerekin ere gauza bera egin zuen, Al-Shababeko komandante izandakoarekin.
