Fiskaltzak "guztiaren jarraipena" egiten du, eta deliturik izanez gero "berehala" esku hartuko luke. Hala argitaratu du La Razon kazetak Espainiako Gobernuko iturriak aipatuz. Madrilen ustez, badira delitu zantzuak ANC Kataluniako Biltzar Nazionala egiten ari den sinadura bilketan, eta biltzarraren inguruko informazioa jasotzen ari da fiskala hura legez kanporatzeko.
"Sina ezazu boto bat independentziaren alde". Lelo horren pean abiatu zuen urtarrilean ANCk aurtengo kanpaina independentista. Denera, aurten bost proiektu gauzatzeko asmoa du, eta lehena da sinadura bilketarena, herritarrek parlamentuari azaroaren 9ko erreferenduma antolatzeko eska diezaioten, eta, Espainiak hura debekatuko balu, independentzia alde bakarrez aldarrika dezan.
