Autodeterminazioa eskubidea da, ez krimena. Lelo horixe irakur daiteke egunotan Erromako autobus geltoki askotan. 600 iragarki taula baino gehiago kontratatu ditu ANC Biltzar Nazional Katalanak, Kataluniako prozesu subiranistaren berri eman eta italiarrak nahiz turistak "oinarrizko eskubideen inguruan" sentsibilizatzeko. Zehazki, Kataluniaren autodeterminazio eskubidearen berri eman nahi dute, Make a move kanpainaren barruan.
Hilaren 25ean hasi ziren Erroman kartelak jartzen, eta hamabost bat egunez egongo dira. "Kide eta jarraitzaile guztiak gonbidatzen ditugu kanpainari zabalpena eman diezaioten, eta egunotan Erroma bisitatzen duzuenoi, argazkiak, txioak edo dena delakoak bidal ditzazuen", adierazi du ANCko kideek ohar batean.
Erroman ez ezik, Londresen eta Bruselan ere egitekoa dute kanpaina hori.
