Arabiar Ligaren Siriako misioa utzi egingo dute Golkoko sei herrialdek

GCC Persiar golkoko Lankidetzarako Kontseiluak Sirian Arabiar Ligak duen misiotik behatzaileak ateratzea erabaki du, bere ustez Damaskok ez diolako kasurik egin arabiarren bake proposamenari, eta arazoa bere gain har dezala eskatu dio NBEren Segurtasun Kontseiluari. Baxar al-Assaden erregimenak, baina, behatzaileen misioa hilabete luzatzeko baimena helarazi dio Nabil al-Arabi Arabiar Ligako idazkari nagusiari.

Saudi Arabiak hartutako erabakiarekin bat eginez, Qatarrek, Omanek, Arabiar Emirerri Batuek, Kuwaitek eta Bahrainek igandea baino lehen aterako dituzte behatzaileak.