Bhumibol Adulyadej Thailandiako erregeak onespena eman dio Prayuth Chan-ocha jeneralari lehen ministro izateko. Estatu kolpea ematearekin bat, armadak adierazi zuen horrek ez zuela kolpearekin zerikusirik izan. Errege etxeak ez zuen deus egin kolpearen aurka, eta gaur, aldiz, lehen ministro izendatu du armadako burua.
Armadak Bangkoken duen egoitzan izan da izendapen ekitaldia, nahiz erregea ez den bertan izan —osasunez makal dabil—. Chan-ochak, berriz, baieztatu du "beharrezkoa" dela hauteskundeak "laster" egitea lehen ministro eta gobernu berriak aukeratzeko, baina ez du inolako egutegirik edo eperik aurkeztu horiei dagokienez.
