Herenegun gauean batzartu ziren Egipton Europako Batasuneko Atzerri Politika eta Segurtasunerako ordezkari Catherine Ashton eta Mohamed Mursi Egiptoko presidente ohia. Bi orduz izan ziren hizketan, eta bilera horretan zer hitz egin zuten ez da informaziorik argitaratu kasik. Presidente ohia "ongi" dagoela eta telebista ikusteko zein berripaperak irakurtzeko baimena duela nabarmendu zuen EBko ordezkariak.
Mohamed Beltagy Askatasun eta Justiziaren Alderdiko —Anaia Musulmanekin lotura du— presidenteordearen arabera, Ashtonek presioa egin zion Mursiri, haren kargugabetzea onar dezan. Gaineratu du Mursik baztertu egin duela aukera hori.
Ashtonek, berriz, ukatu egin du Mursiri "irtenbide seguru bat" eskaini izana: "Ez dut halakorik egin". Uztailaren 3an kendu zuten Mursi presidentetzatik, eta harrezkero ez dute jakinarazi non duten atxilo.
