'Astearte handiak' berdinduta utzi ditu Clinton eta Obama

Milioika estatubatuarrek eman zuten atzo botoa AEBetako presidentegai demokrata zein errepublikanoa aukeratzeko hauteskunde primarioetan. Egun erabakigarria zen atzokoa, Astearte handia, 24 estatutan egin baitziren bozak, haien artean ordezkari gehien dituzten estatuetan. Normalean, Astearte handian zehazten da nortzuk izango diren alderdi bateko zein besteko hautagaiak.

Oraingoan, ordea, ez da erabat hala gertatu: errepublikanoen hautagaia John McCain izango dela argi geratu da, baina Alderdi Demokratan parekatua geratu dira Hillary Clinton eta Barack Obama; batek zein besteak presidentegai izateko aukerekin jarraitzen dute aurrera. Izan ere, Obamak Clintonek baino estatu gehiagotan irabazi du -hamahirutan izan da garaile Obama eta zortzitan Clinton-, baina estatu handienetan, eta, ondorioz, ordezkari gehien dituztenetan, Clinton nagusitu da, hala nola, Kalifornian eta New Yorken.

Alderdi Errepublikanoak gehiengo sistema erabiltzen du ordezkaritzak erabakitzeko; hau da, estatu baten nagusitzen den hautagaiarentzat izaten dira eremu horretako ordezkari guztiak. Aldiz, demokratek proportzionalki banatzen dituzte ordezkariak, eta horregatik lausoagoak gertatzen dira garaipenak.

Nolanahi ere, zenbait analistak uste dut Clinton atera dela indartuta Astearte handitik, behetik gora datorren hautagaiaren itxura ematen ari delako.