Atzo arratsean, Munichen (Alemania) elkartu ziren Siria Laguntzeko Nazioarteko Taldea osatzen duten herrialdeak, eta bertan hitzartu zuten astebeteko epean erasoak etetea eta giza laguntza zabaltzea. Talde horretan daude, besteak beste, Ameriketako Estatu Batuak, Errusia, Turkia, Iran, Saudi Arabia, Qatar, Egipto, Frantzia, Alemania eta Erresuma Batua.
Sei orduko negoziazioen ostean jarri dira ados. Siriako Gobernuak ez dio akordioaren aurrean erantzunik eman; oposizioko koalizioak, ordea, ontzat jo du.
John Kerry AEBetako estatu idazkariak eta Sergei Lavrov Errusiako Atzerri ministroak, elkarrekin egindako agerraldi batean, azaldu dute konpromisoa hartu dutela indarkeria astebeteko epean eteteko, "anbizio handiko helburua" betetzeko. Menia horretatik su-eten "iraunkor" baterako urratsa nola egin zehazteko, Nazio Batuen Erakundean lantalde bat osatuko dute Errusiak eta AEBek zuzenduta, Kerryk azaldu duenez.
Gainera, taldea osatzen duten kide guztiek konpromisoa azaldu dute Sirian zibilen artean giza laguntza berehala zabaltzeko. Akordioa gehien kaltetutako eremuetan hasiko dira ezartzen, Kerryren arabera.
Lavrovek, berriz, azpimarratu du Errusia eta AEBak buru dituen koalizioa militarki koordinatzeko asmoa dela aurrerapauso nagusia: "Aldaketa kualitatiboa da, aspaldi eskatzen ari ginena eta orain txalotzen duguna".
